ਮੇਰਾ ਆਪਣਾ ਪੰਜਾਬ-ਜਲੰਧਰ-(ਸਤੀਸ਼ ਸੋਢੀ): ਪ੍ਰਸਿੱਧ ਸੂਫੀ ਸ਼ਾਇਰ ਮਰਹੂਮ ਉਸਤਾਦ ਅਲਮਸਤ ਦੇਸਰਪੁਰੀ ਦੀ ਚੌਥੀ ਬਰਸੀ ਉਨ੍ਹਾਂ ਦੇ ਪਿੰਡ ਦੇਸਰਪੁਰ ਜ਼ਿਲ੍ਹਾ ਜਲੰਧਰ ਵਿਖੇ ਸ਼ਰਧਾ ਨਾਲ ਮਨਾਈ ਗਈ। ਇਸ ਮੌਕੇ ਦਰਬਾਰ ਦੇ ਗੱਦੀ ਨਸ਼ੀਨ ਸਾਈਂ ਸੋਨੂੰ ਦੇਸਰਪੁਰੀ, ਸਰਪੰਚ ਪਰਮਜੀਤ ਸਿੰਘ, ਅਸ਼ੋਕ ਕੁਮਾਰ, ਸੂਫ਼ੀ ਸ਼ਾਇਰ ਸਤੀਸ਼ ਦਰਦੀ ਵਲੋਂ ਸਮੂਹਿਕ ਤੌਰ ਉੱਤੇ ਅਲਮਸਤ ਹੁਰਾਂ ਦੀ ਮਜ਼ਾਰ ਉੱਤੇ ਚਾਦਰ ਚੜ੍ਹਾਈ ਗਈ ਅਤੇ ਚਿਰਾਗ ਰੌਸ਼ਨ ਕੀਤੇ ਗਏ। ਜ਼ਿਕਰਯੋਗ ਹੈ ਕਿ ਮੱਧ ਪੂਰਬ ਤਣਾਅ ਕਾਰਨ ਅਲਮਸਤ ਹੁਰਾਂ ਦੇ ਵੱਡੇ ਫਰਜ਼ੰਦ ਸਾਗਰ ਦੇਸਰਪੁਰੀ, ਜੋ ਇਸ ਸਮੇਂ ਵਿਦੇਸ਼ ਵਿਚ ਹਨ ਅਤੇ ਬਰਸੀ ਸਮਾਗਮਾਂ ਦੇ ਸੂਤਰਧਾਰ ਹਨ, ਇਸ ਮੌਕੇ ਸ਼ਿਰਕਤ ਨਹੀਂ ਕਰ ਸਕੇ। ਜਿਸ ਕਾਰਨ ਇਸ ਵਾਰ ਬਰਸੀ ਸਮਾਗਮ ਮੌਕੇ ਸਟੇਜ ਨਹੀਂ ਲਗਾਈ ਗਈ ਅਤੇ ਸਾਦੇ ਢੰਗ ਨਾਲ ਹੀ ਇਹ ਸਮਾਗਮ ਕਰਵਾਇਆ ਗਿਆ। ਇਸ ਮੌਕੇ ਹਾਜ਼ਰ ਪਤਵੰਤਿਆਂ ਨੇ ਅਲਮਸਤ ਹੁਰਾਂ ਦੇ ਜੀਵਨ ਅਤੇ ਗੀਤਕਾਰੀ ਸਫ਼ਰ ਉੱਤੇ ਚਾਨਣਾ ਪਾਇਆ ਅਤੇ ਉਨ੍ਹਾਂ ਨੂੰ ਯਾਦ ਕਰਦਿਆਂ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਵੱਖ-ਵੱਖ ਸੂਫ਼ੀ ਦਰਬਾਰਾਂ ਤੋਂ ਸੂਫ਼ੀ ਫ਼ਕੀਰਾਂ ਨੇ ਵੀ ਇਸ ਮੌਕੇ ਸ਼ਿਰਕਤ ਕੀਤੀ, ਜਿਨ੍ਹਾਂ ਵਿੱਚ ਬਾਬਾ ਰੋਡੇ ਸ਼ਾਹ ਦਰਬਾਰ, ਜੱਲੋਵਾਲ ( ਕਾਲ਼ਾ ਸੰਘਿਆਂ) ਤੋਂ ਸਾਈਂ ਕੁਲਵਿੰਦਰ ਸ਼ਾਹ, ਜਗਤਾਰ ਪਰਵਾਨਾ ਸਭਿਆਚਾਰਕ ਮੰਚ ਅਠੌਲਾ ਤੋਂ ਸਾਈਂ ਬਲਬੀਰ ਸ਼ਾਹ ਆਦਿ ਪ੍ਰਮੁੱਖ ਸਨ। ਇਸ ਮੌਕੇ ਪਿੰਡ ਦੇ ਸਰਪੰਚ ਪਰਮਜੀਤ ਸਿੰਘ ਅਤੇ ਸਮੂਹ ਨਗਰ ਪੰਚਾਇਤ ਦਾ ਵੀ ਵਿਸ਼ੇਸ਼ ਯੋਗਦਾਨ ਰਿਹਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਫਰਾਂਸ ਤੋਂ ਬਲਰਾਮ ਸਿੰਘ, ਮਨੀ ਕੋਟਲੀ, ਅਸ਼ੋਕ ਕੁਮਾਰ, ਠੇਕੇਦਾਰ ਪਰਮਜੀਤ ਸਿੰਘ ਅਠੌਲਾ, ਸਰਪੰਚ ਸੰਤੋਖ ਸਿੰਘ ਅਠੌਲਾ, ਗੋਰਾ, ਸੁੱਚਾ ਸਿੰਘ ਆਦਿ ਵੀ ਹਾਜ਼ਰ ਸਨ। ਸਮਾਗਮ ਦੌਰਾਨ ਅਤੁੱਟ ਲੰਗਰ ਵੀ ਵਰਤਾਏ ਗਏ।
About the Author
